Pune Rain Alert गेल्या काही दिवसांच्या उघडिपीनंतर आणि असह्य उकाड्यानंतर अखेर वरुणराजाने पश्चिम महाराष्ट्रावर पुन्हा एकदा कृपा केली आहे. वातावरणात अचानक झालेल्या बदलामुळे पावसाने दमदार पुनरागमन केले आहे. भारतीय हवामान विभागाने (IMD) दिलेल्या ताज्या माहितीनुसार, आज पश्चिम महाराष्ट्रातील पुणे, सोलापूर, सातारा आणि सांगली या चार महत्त्वाच्या जिल्ह्यांना वादळी वाऱ्यासह पावसाचा ‘यलो अलर्ट’ (Yellow Alert) देण्यात आला आहे.
उन्हाचा चटका आणि वाढलेल्या आर्द्रतेमुळे नागरिक हैराण झाले होते, पण आता या पावसाच्या आगमनाने वातावरणात गारवा निर्माण होण्याची शक्यता आहे. चला तर मग, जाणून घेऊया तुमच्या जिल्ह्यात पावसाची काय स्थिती आहे.
पुणे (Pune): उकाडा कायम, पण पावसाची शक्यता
पुणे शहरात आणि जिल्ह्यात उकाडा अजूनही कायम आहे. मागील २४ तासांत शहरात ३३ अंश सेल्सिअस कमाल तापमानाची नोंद झाली. मात्र, पुणेकरांसाठी एक दिलासादायक बातमी आहे. हवामान विभागाच्या अंदाजानुसार (Weather Forecast), पुढील २४ तासांत कमाल तापमानात थोडी घट होऊन आकाश सामान्यतः ढगाळ राहील. तसेच, गडगडाटी वादळासह मध्यम स्वरूपाच्या पावसाची शक्यता वर्तवण्यात आली आहे. याच पार्श्वभूमीवर, पुणे जिल्ह्यासाठी सतर्कतेचा ‘येलो अलर्ट’ (Pune Rain Alert) कायम ठेवण्यात आला आहे. त्यामुळे बाहेर पडताना नागरिकांनी काळजी घ्यावी, असे आवाहन करण्यात आले आहे.
सातारा (Satara) आणि सांगली (Sangli): वादळी वाऱ्यासह पावसाचा इशारा
साताऱ्यातही पावसासाठी पोषक हवामान तयार झाले आहे. गेल्या २४ तासांत जिल्ह्यात १५.३ मिलिमीटर पावसाची नोंद झाली आहे. पुढील २४ तासांत कमाल तापमान ३३ अंश सेल्सिअस राहण्याचा अंदाज असून, जिल्ह्यात वादळी वाऱ्यासह जोरदार पावसाची शक्यता असल्याने ‘यलो अलर्ट’ जारी करण्यात आला आहे.
सांगली जिल्ह्यालाही पावसाने दिलासा दिला आहे. मागील २४ तासांत कमाल तापमान ३०.९ अंशांवर राहिले आणि अधूनमधून हलक्या सरी बरसल्या. आता पुढील २४ तासांत विजांच्या कडकडाटासह पावसाचा जोर वाढणार असल्याचा अंदाज असल्याने, सांगली जिल्ह्यासाठीही ‘येलो अलर्ट’ देण्यात आला आहे.
सोलापूर (Solapur): मध्यम पावसाचा अंदाज
सोलापूर जिल्ह्यात मागील २४ तासांत केवळ २ मिलिमीटर पावसाची नोंद झाली असली तरी, आता पावसाचा जोर वाढणार आहे. पुढील २४ तासांत येथील कमाल तापमान ३५ अंश सेल्सिअस राहण्याची शक्यता आहे. आकाश पूर्णपणे ढगाळ होऊन वादळी वाऱ्यासह मध्यम स्वरूपाच्या पावसाचा ‘यलो अलर्ट’ हवामान विभागाने दिला आहे.
कोल्हापूर (Kolhapur): हलक्या सरींची शक्यता
कोल्हापुरात मात्र पावसाचा जोर तुलनेने कमी राहील, असा अंदाज आहे. मागील २४ तासांत कोल्हापूर शहरात तब्बल ३० मिलीमीटर पावसाची नोंद झाली आहे. याशिवाय, कागलमध्ये २० मिमी आणि हातकणंगले, गारगोटी परिसरात प्रत्येकी १० मिमी पाऊस झाला. पुढील २४ तासांत कमाल तापमान ३३ अंश सेल्सिअस राहील आणि आकाश सामान्यतः ढगाळ राहून हलक्या पावसाच्या सरींची शक्यता आहे.
पावसासाठी पोषक हवामान का तयार झाले? (Meteorological Conditions)
राज्यात पावसाच्या या पुनरागमनासाठी काही वैज्ञानिक कारणे आहेत. सध्या मराठवाडा आणि कर्नाटकच्या परिसरावर समुद्राच्या सपाटीपासून ३.१ किलोमीटर उंचीवर एक चक्राकार वाऱ्याची प्रणाली (Cyclonic Circulation) सक्रिय आहे. यासोबतच, मध्य महाराष्ट्रापासून आंध्र प्रदेशपर्यंत हवेच्या कमी दाबाचा पट्टा (Low-Pressure Trough) निर्माण झाला आहे. या दोन्ही अनुकूल परिस्थितीमुळे राज्यात पावसासाठी पोषक हवामान तयार झाले असून, येत्या काही दिवसांत पावसाचा जोर कायम राहण्याची शक्यता आहे.
नागरिकांनी हवामान विभागाच्या सूचनांचे पालन करावे आणि विशेषतः ‘यलो अलर्ट’ दिलेल्या जिल्ह्यांमध्ये अधिक सतर्क राहावे.
